Nakið hold, nammi og sjávarútvegsmál

Í gær hófst Sjávarútvegssýningin og lýkur henni á morgun. Þarna er margt fyrir augað og ótrúlega forvitnilegt. Góð aðsókn hefur verið á sýninguna, enda hittast þar margir, jafnvel menn sem aldrei hafa séð hvern annan, heldur aðeins rætt saman á netinu. Tökum sem dæmi að þarna voru í dag báðir söguritarar þessarar síðu þeir Emil Páll og Þorgeir Baldurs og meðan Emil dvaldi, hitti hann í fyrsta sinn menn sem komið hafa við hér á síðunni s.s. Tryggva Sig, Jón Pál, Arnbjörn Eiríksson (Bjössa á Stafnesi), Pétur Sigurgeir Sigurðsson, Hilmar Snorrason o.fl. o.fl. Að venju var Þorgeir duglegur að taka myndir af atburðum svo og einstaklingum og verða þær myndir birtar hér á síðunni í myndaalbúmi. Emil Páll skaut á nokkrar uppákomur svona til að sjá breytileikann á sýningunni. Þarna sjáum við stúlkur sem voru að mestu naktar en vel málaðar um kroppinn. Einn af þeim fjölmörgu stöðum sem bauð upp á næringu og síðan einn af þeim bátum sem var til sýnis, en hér sjáum við um hvað er verið að tala.

                                                   Já þetta eru mikil listaverk

                                               Þá var þessi hlið ekki síður listaverk

          Víða var hægt að fá næringu ýmist í drykkjarformi, til að narta, borða eða í súpuformi. Hér sjáum við úr bás Sandgerðisbæjar, þar sem Stefán Sigurðsson, veitingamaður á Vitanum er að dreifa súpu og til hliðar við hann er Reynir Sveinsson, forstöðumaður Fræðasetursins og faðir Gísla Reynissonar sem flytur okkur aflafréttirnar.

 Margt myndrænt var um allan sýningaskálann, en þar látum við duga að benda á myndaalbúmið sem Þorgeir er að útbúa og kemur inn á síðuna. Þess í stað birtum við hér mynd af eina bátnum sem til sýnis var utandyra og var smíðaður fyrir innlenda aðila - © myndir Emil Páll